07 сар
Сэлэнгэ, Булган, Төв аймгийн нутагт дэгдсэн ой хээрийн түймрийг унтраахад санхүүгийн дэмжлэг үзүүллээ.
Сэлэнгэ, Төв, Булган аймгийн газар нутагт ой хээрийн гал түймэр дэгдэн, ой хээрийн бүс нутагт ихээхэн хэмжээний хор хохирлыг учруулаад байна. Эдгээр түймрийг унтраахаад Онцгой байдлын байгууллага, Зэвсэгт хүчний анги нэгтгэл болон нутгийн иргэд гээд 1200-аад хүн түймрийн голомтод үүрэг гүйцэтгэж байна.
Өмнөговь аймгийн Засаг Даргын Тамгын Газраас уг түймрийг унтраах үйл ажиллагаанд хандив туслалцаа дэмжлэг үзүүлэхийг аймгийн нийт иргэд байгууллагуудад уриалж хандивын хүсэлт ирүүлсний дагуу Говийн Оюу Хөгжлийг дэмжих сангаас Сэлэнгэ, Төв аймгийн нутгаар дэгдсэн ой хээрийн түймрийг унтраах, хор уршгийг арилгахад дэмжлэг үзүүлэхээр 10 сая төгрөгийн дэмжлэгийг Өмнөговь аймгийн Онцгой байдлын газарт 2017 оны 07 сарын 19-ны өдөр шилжүүллээ.
Ой хээрийн түймрээс сэргийлэх үүднээс Онцгой байдлын газраас иргэдэд өгч буй санамж.
- Түлсэн гал, асаасан шүдэнз, татсан тамхины гал, цог, нурмыг бүрэн унтраах,
- Түймэрт нэрвэгдэж болзошгүй нутаг дэвсгэрийг түймрээс хамгаалах зурвастай болгох,
- Түймрийн хуурайшилт ихтэй үед ой, хээрт ил задгай гал түлэхгүй байх,
- Машин, техникийн утааны янданг оч баригчтай болгох,
- Гэр байшин, малын хашаа, саравч, өвс тэжээл, худгийн эргэн тойронд 100-аас доогүй метрийн өргөнтэй цурав татах, шороон зурвас гаргах,
- Түймрийн аюултай үед айл өрх бүр халуун үнс, нурмыг тусгайлан бэлдсэн таглаа бүхий нүх, саванд хийж байх,
- Насанд хүрээгүй хүүхдийг түймрийн аюултай үед ой, хээрт чүдэнз, асаагууртай явуулахгүй байх,
- Иргэн, айл өрх бүр гал түймэр унтраах багаж хэрэгсэлтэй байх,
- Зарлан мэдээллийн дуут дохиойтой байх
- Иргэн та ой хээрийн түймэр гарсан тохиолдолд Онцгой байдлын алба болон орон нутгийн төрийн захиргааны байгууллагад яаралтай мэдээлэх, түймэр унтраах ажиллагаанд иргэний үүргийн дагуу оролцох үүрэгтэй.