Манай улсын тогтвортой хөгжлийн үндэс нь шавхагдашгүй нөөц болох боловсролтой, чадвартай монголын иргэд билээ. Өмнөговийн ирээдүйг авч явах эдгээр иргэдийг сургаж, өөрийн мэдлэгээсээ хуваалцаж байдаг багш нарыг сургах, тэдний чадавхийг сайжруулах “Багшийн хөгжил” хөтөлбөр нээлтээ хийж Өмнөговь аймгийн багш нар сургалтын шинэ арга барилд суралцах боломжтой боллоо.

Говийн Оюу хөгжлийг дэмжих сангаас санхүүжүүлэн Поларис Боловсролын Академиийн хэрэгжүүлж буй уг хөтөлбөрийн хүрээнд Өмнөговь аймгийн ерөнхий боловсролын сургуулиудын багш, нийгмийн ажилтангууд болон сургуулийн өмнөх боловсролын багш нар ур чадвар, бүтээлч байдал болон гадаад хэлний мэдлэг, түвшингээ ахиулах юм.

Чадварлаг багш нараас номын их далайгаас эрдэм мэдлэгийг хүртэж буй сурагчид багш нарынхаа адил  гэр бүлийн боловсролыг олж аван өсвөрийн сургагч багш болон бэлтгэгдэж, улмаар үе тэнгийн найзууддаа сурсан мэдсэнээ хуваалцах “Ирээдүйд гэрэлтэх нас” хөтөлбөрт хамагдаж байна. Уг хөтөлбөрийг Монголын гэр бүлийн сайн сайхны төлөө нийгэмлэг санаачлан, Говийн оюу хөгжлийг дэмжих сан санхүүжүүлсэн. Хөтөлбөрийн хүрээнд өсвөр үеийнхэнд тулгардаг асуудлууд, тэдгээрийг хэрхэн шийдвэрлэх, нөхөн үржихүйн эрүүл мэндийн талаар цогц мэдлэгийг олгох юм.