05 сар
Гүйцэтгэх захирлын албан тушаалд өргөдөл хүлээн авах тухай
ГОВИЙН ОЮУ ХӨГЖЛИЙГ ДЭМЖИХ САНГИЙН
Гүйцэтгэх захирлын албан тушаалд өргөдөл хүлээн авах тухай
Холбогдох мэдээлэл
“Оюу Толгой” ХХК нь Өмнөговь аймаг болон Түншлэгч сумд болох тус аймгийн Ханбогд, Манлай, Баян-Овоо, Даланзадгад сумд (хамтад нь “Талууд” гэх)-тай хамтын ажиллагаагаа үргэлжлүүлэх, ашиг сонирхлоо харилцан хүндэтгэх, дэмжих, Өмнөговийн нийгэм, эдийн засгийн тогтвортой хөгжлийг дэмжих чиглэлээр “Хамтын ажиллагааны гэрээ”-г 2015 онд байгуулан гэрээний хэрэгжилтийг хангах үүрэг бүхий “Говийн Оюу” Хөгжлийг дэмжих сан (ХДС)-г байгуулсан билээ.
ХДС нь Өмнөговь аймгийн тогтвортой хөгжлийг дэмжихэд зориулж “Оюу толгой” ХХК-аас олгох санхүүгийн дэмжлэгийг удирдаж, захиран зарцуулах үүрэгтэй. Уг сан нь Өмнөговь аймгийн нийгэм, эдийн засгийн хөгжлийг дэмжих болон нийгмийн дэд бүтэц, эдийн засгийн оролцоог нэмэгдүүлэхэд чиглэсэн төсөл, хөтөлбөрүүдийг дэмжих замаар Өмнөговь аймгийн иргэдийн амьжиргаа, орон нутгийн чадавхийг дээшлүүлэхэд онцгойлон ач холбогдол өгч ажилладаг.
ХДС нь “Оюу толгой” ХХК болон Өмнөговь аймаг дах төрийн болон засаг захиргааны байгууллагаас тусдаа, бие даасан байгууллага бөгөөд удирдамж, чиглэлээ Удирдах зөвлөл (УЗ)-өөсөө авч, “Хамтын ажиллагааны гэрээ”-нд тусгагдсан зарчим, үүрэг, эрх хэмжээ, санхүүжилтийн бодлого, удирдамж, мөн ХДС-ийн УЗ-өөс цаашид батлах аливаа бодлогыг баримталж ажиллах үүрэгтэй.
Гүйцэтгэх захирал нь ХДС-ийн засаглал болон гүйцэтгэлийн төлөвлөгөөнд чухал үүрэг гүйцэтгэх албан тушаалтан бөгөөд ХДС-ийн Удирдах зөвлөлийн дарга болон гишүүдэд ажлаа шууд тайлагнана.
Гүйцэтгэх захирлын ажил үүргийн талаарх дэлгэрэнгүй мэдээллийг дор дурьдсан бөгөөд Оюу толгой-Өмнөговь аймгийн “Хамтын ажиллагааны гэрээ” болон түүнд тусгасан ХДС-ийн талаарх заалтуудтай доорх хаягаар орж танилцах боломжтой. http://www.goviinoyu.mn/resources/img/uploads/Cooperation_agreement_mon_2015.04.22.pdf
Ажлын байр
“Говийн Оюу” Хөгжлийг дэмжих сан (ХДС) Өмнөговь аймгийн Даланзадгад суманд ажиллах Гүйцэтгэх захирлын ажлын байранд зохих шалгуур хангасан хүнийг сонгон шалгаруулна.
Энэхүү албан тушаалын гол зорилго нь ХДС-ийн Удирдах зөвлөлөөс олгосон эрх, үүргийн хүрээнд сангийн өдөр тутмын удирдлагын үйл ажиллагааг хариуцан ажиллах болно. Гүйцэтгэх захирал нь ХДС-ийн Удирдах зөвлөлд ажлаа тайлагнана.
Чиг үүрэг
- ХДС-ийн Удирдах зөвлөлөөс баталсан стратеги, төлөвлөгөө, төсвийг удирдан зохицуулах, хэрэгжүүлэх, мөн стратеги, төлөвлөгөө болон төсвийг боловсруулахад Удирдах зөвлөлд дэмжлэг үзүүлж ажиллах.
- ХДС-ийн ажлын албаны туслалцаатайгаар ХДС-ийн бүх шийдвэр гаргах үйл явц бүрэн баримтжуулагдаж, хадгалагдаж байх явдлыг хангахын тулд албан хэрэг хөтлөлт болон захидал харилцааг хариуцах,
- Удирдах зөвлөл болон Итгэмжлэгдсэн зөвлөхтэй хамтарч ХДС-ийн үйл ажиллагааг түүний дүрэм болон Монгол Улсын хууль тогтоомжид нийцүүлэн ажиллах,
- ХДС-ийн дэмжлэгийг хүссэн орон нутгийн төсөд, хөтөлбөрүүдийн саналуудыг ХДС-ийн санал хүлээн авах журмын дагуу хүлээн авч, ХДС-ийн Удирдах зөвлөлийн хуралд сонгон шалгаруулалтын шалгуурын дагуу танилцуулж шийдвэр гаргуулах ажлыг хариуцах,
- Удирдах зөвлөлөөс өгсөн чиглэлийн дагуу ХДС-ийн байгуулах аливаа гэрээ, хэлцлийг хэрэгжүүлэх, удирдлагаар хангах,
- ХДС-аас санхүүжүүлсэн болон санхүүжүүлэх төсөл, хөтөлбөрүүдийн явц, цаашдын үүрэг, амлалтын ерөнхий нөхцөл байдлын талаар бүртгэл хөтлөх,
- ХДС-ийн Удирдах зөвлөл болон Харилцааны хороо нь Санхүүжүүлсэн төсөл, хөтөлбөрүүдийн хэрэгжилтийн явц тохиролцсон шалгууруудын дагуу явагдаж буйд хяналт тавьж, шаардлагатай үед дэмжлэг туслалцаа үзүүлэх, аливаа тулгамдсан асуудлуудыг Удирдах зөвлөлд цаг тухайд нь тайлагнах,
- Удирдах зөвлөлөөс олгосон эрх хэмжээний хүрээнд болон ХДС-ийн Удирдах зөвлөлийн даргаас тусгайлан зөвшөөрснөөр ХДС-ийн эд хөрөнгийг захиран зарцуулах,
- ХДС-ийн дүрэмд заасан болон хуульд нийцүүлэн Удирдах зөвлөлөөс өгсөн бусад үүргүүд.
Тавигдах шаардлага
- Нийтийн удирдлага, хөгжлийн менежмент буюу ижил төстэй чиглэлээр мэргэжил эзэмшсэн, бакавлавр ба түүнээс дээш зэрэгтэй;
- Удирдан, зохион байгуулах чадвартай байх, төрийн болон төрийн бус, хувийн хэвшлийн байгуулагад удирдах түвшинд 5-аас доошгүй жил амжилттай ажилласан туршлагатай байх;
- Өмнөговь аймгийн нутгийн удирдлага болон нийгэм, эдийн засгийн талаар сайн ойлголттой байх;
- Өмнөговь аймгийн оролцогч талуудтай үр дүнтэй харилцаа тогтоох чадвартай байх;
- Төрийн бус байгууллага, сангийн үйл ажиллагаа, санхүү болон удирдлагын талаар сайн мэдлэгтэй байх;
- Бичгийн болон харилцааны ур чадвар сайтай байх;
- Англи хэлний дунд ба түүнээс дээш түвшний мэдлэгтэй байх;
Сонирхож буй хүмүүс дараах бичиг баримтыг 2022 оны 5-р сарын 17-ны өдрийн 17:30 цагаас өмнө бүрдүүлэн otcareer@ot.mn цахим шуудангаар илгээнэ үү.
- Ажилд орохыг хүссэн өргөдөл (англи, монгол хэлээр)
- Товч намтар (англи, монгол хэлээр)