Говийн Оюу хөгжлийг дэмжих сангийн санхүүжилтийн хүртээмжийг нэмэгдүүлэх, сумдын иргэдийн санал, санаачлагыг оролцоог нэмэгдүүлэх, улмаар сумдын тэгш хөгжлийг дэмжих зорилгоор сангийн Удирдах зөвлөл 2018 оноос эхлэн сангийн түншлэгч сумд болон уул уурхайн олборлолт явагдахгүй байгаа сумдад санхүүжилтийн квот олгохоор шийдвэрлэсэн.  Уг шийдвэрийн дагуу сангийн түншлэгч сумд болох Ханбогд суманд 70,000,  Манлай, Баян-Овоо, Даланзадгад сум тус бүрт 50,000, уул уурхайн олборлолт явагдахгүй байгаа Баяндалай, Булган, Номгон, Сэврэй, Цогт-Овоо сумдад тус бүрт 30,000 доллар буюу түүнтэй тэнцэх хэмжээний төгрөгийн санхүүжилтийг олгосон. Тухайн санхүүжилтээр сумын иргэд, байгууллагууд өөрсдийн хэрэгцээ шаардлагад тулгуурлан сум орон нутагтаа хэрэгцээтэй, ашгийн бус, нийтэд хүртээмжтэй төсөл, хөтөлбөрийг удирдлага, иргэдээс бүрдсэн эрэмбэлэх болон сонгон шалгаруулах ажлын хэсгээр хэлэлцүүлэн сангийн холбогдох дүрэм, журмын дагуу батлуулж хэрэгжүүлсэн юм.

Говийн оюу хөгжлийг дэмжих сангийн сангийн ажлын албаныхан 2019.02.25-ны өдөр Даланзадгад суманд 2018 онд санхүүжилтийн квотоор сумандаа хэрэгжүүлсэн төслийн явц, үр өгөөж, төсөл хэрэгжүүлэлтийн ололт амжилт болон хэрэгжүүлэх явцад тулгарсан хүндрэл, сургамжийн талаар сангийн зорилтот сумдын Засаг Даргын тамгын газрын дарга болон төсөл хариуцсан ажилтан нар хоорондоо туршлага солилцох, мөн сангаас 2019 онд сумдад олгох санхүүжилтийн квот, цаашид төсөл бичих, хэрэгжүүлэхэд анхаарах зүйлсийн талаар мэдээлэл өглөө.  2018 онд санхүүжилтийн квотоор сумдын иргэд нийтдээ 40 гаруй төслийг санаачлан хэрэгжүүлсэн юм.

2019 онд шинээр Мандал-Овоо суманд санхүүжилтийн квот олгохоор Удирдах зөвлөлөөс шийдвэрлэсэн ба нийт 10 суманд санхүүжилтийн квот олгохоор боллоо.