09 сар
Ахмадуудад үзүүлэх эрүүл мэндийн үйлчилгээний хүртээмжийг дээшлүүлэх хөтөлбөрийн нээлт боллоо
Өмнөговь аймгийн Засаг Даргын Тамгын Газраас санаачлан “Говийн Оюу хөгжлийг дэмжих сан”-аас санхүүжүүлж, Эрүүл мэндийн газраар удирдуулан БОЭТ, Тэгш дүүрэн төгөлдөр эмнэлэг хамтран хэрэгжүүлж буй “Ахмадуудад үзүүлэх эрүүл мэндийн үйлчилгээний хүртээмжийг дээшлүүлэх” хөтөлбөрийн нээлтийн үйл ажиллагаа 2017 оны 09 сарын 07-ны өдөр Даланзадгад суманд боллоо. Хөтөлбөрийн нээлтэнд Өмнөговь аймгийн Засаг Даргын орлогч Х.Батболд, Нийгмийн бодлогын хэлтсийн дарга Ү.Энхцацрал, Оюу толгой ХХК-ийн Даланзадгад дахь төлөөлөгчийн газрын менежер Д.Олжмэдэх, Өмнөговь аймгийн ахмадын хорооны дарга А.Цээсодном, Эрүүл мэндийн газрын эмнэлгийн тусламж үйлчилгээний хэлтсийн дарга Ж.Отгонбайгал, Тэгш дүүрэн төгөлдөр эмнэлгийн их эмч Д.Чулуунцэцэг нар болон бусад зочид төлөөлөгч, иргэд, ахмадууд оролцлоо.
Өмнөговь аймгийн Засаг Даргын орлогч Х.Батболд хөтөлбөрийг нээж хэлсэн үгэндээ “Өмнөговь аймгийн Засаг Даргын зүгээс ахмадад зориулсан бодлогын ажлууд хийгдэж байгаагийн нэг нь өнөөдрийн нээлтээ хийж буй ахмадын эрүүл мэндэд чиглэсэн хөтөлбөр юм. Засаг даргын санаачлагыг дэмжин Оюу толгой ХХК-ийн хөрөнгө оруулалттай Говийн Оюу хөгжлийг дэмжих сангийн санхүүжилтээр хэрэгжиж ахмадад чиглэсэн эрүүл мэндийн үйлчилгээнд ахмадуудаа идэвхитэй хамрагдахыг хүсье” гэсэн бол Оюу толгой ХХК-ийн Даланзадгад суман дахь төлөөлөгчийн газрын менежер Д.Олжмэдэх “Оюу толгой компанийн алсын харааг ажил болгохын хүрээнд Хамтын ажиллагааны гэрээг байгуулан Өмнөговь аймгийн хөгжилд зориулж Говийн Оюу хөгжлийг дэмжих сангаар дамжуулан жил бүр 5 сая ам.доллар буюу 10 тэрбум төгрөгийг төсөл, хөтөлбөр санхүүжүүлэх замаар олгож байгаа билээ. Дээрх санхүүжилтээр Өмнөговь аймагт өнгөрсөн 2 жилийн хугацаанд нийт 22 тэрбум төгрөгийн өртөг бүхий аймгийн нийгэм, эдийн засгийн хөгжилд үр өгөөж авчрах 47 төсөл хөтөлбөрийг хэрэгжүүлж байгаагийн дотор эрүүл мэндийн салбарт 2,0 тэрбум төгрөгийн 5 төсөл хөтөлбөрийг хэрэгжүүлээд байна. Монгол улсын гавъяат эмч Пүрэвээгээр ахлуулсан нарийн мэргэжлийн эмч нар, эмчилгээ, бариа засал хийх сувилагчид, лаборант зэрэг бүрэлдэхүүнтэй баг 15 сумын 3500-аад ахмадуудад эрүүл мэндийн үйлчилгээг үзүүлэх юм” гэв.
Хөтөлбөрийн нээлтэнд Хөгжимт жүжгийн театрын морин хуурч Түмэндэмбэрэл, дуучин СТА Балган, Цэрэн-Очир нар ая дуугаа өргөлөө.
Өмнөговь аймгийн ахмадын хорооны дарга А.Цээсодном “Ахмадуудад чиглэсэн хөтөлбөр дутмаг байдаг. Энэ хөтөлбөр нь зөвхөн ахмадуудад чиглэж хэрэгжиж байгаа нь талархууштай байна. Зүүн сумдаар явсан эрүүл мэндийн үйлчилгээнд хамрагдсан ахмадууд сэтгэл өндөр байгаа. 5 сумын 13 ахмад настан талархсан сэтгэгдлээ бидэнд ирүүлсэн” гэв.
“Ахмадуудад үзүүлэх эрүүл мэндийн үйлчилгээний хүртээмжийг дээшлүүлэх” хөтөлбөрийн үйл ажиллагаа зүүн сумдаар ахмадуудад үзлэг оношилгоо, эмчилгээ хийсэн бол баруун сумдаар 10 сараас эхлэн үзлэг оношилгоог хийх бөгөөд тухай бүрт олон нийтэд зарлан мэдэгдэнэ гэж Эрүүл мэндийн газрын эмнэлгийн тусламж үйлчилгээний хэлтсийн дарга Ж.Отгонбайгал мэдэгдлээ.