Нар хур тэгширсэн намрын сайхан өдрүүд үргэлжилж, налгар сайхан намын сайхан өдөр “Өмнөговь аймагт Хүлэмжийн аж ахуйн цогцолборыг хөгжүүлэх хөтөлбөр”-ийн Ургацын баяр өргөн дэлгэр болж өнгөрлөө. Ургацын баярт Улсын их хурлын гишүүн Н.Амарзаяа, Өмнөговь аймгийн Засаг даргын орлогч Х.Батболд, “Оюу толгой” компанийн Даланзадгад суман дахь төлөөлөгчийн газрын менежер Д.Олжмэдэх, Хөдөө аж ахуйн их сургуулийн захирал доктор, профессор  Т.Хэрүүга болон тариаланч иргэдийн төлөөлөл оролцов.  

Өмнөговь аймгийн Засаг даргын орлогч Х.Батболд өдөрлөгийг нээж хэлсэн үгэндээ “Өмнөговь аймгийн хөгжлийн гурван тулгуур салбарын нэг болох газар тариалангийн салбарын хөгжлийг хөгжүүлэх үүднээс Аймгийн Засаг даргын мөрийн хөтөлбөрт тусгагдсан олон ажлууд хэрэгжиж байгаагийн нэг нь Оюу толгой компанийн хөрөнгө оруулалттай Говийн Оюу хөгжлийг дэмжих сангийн санхүүжилтээр хэрэгжиж буй өнөөдрийн энэхүү Ургацын баяраа тэмдэглэж буй “Өмнөговь аймагт хүлэмжийн аж ахуйн цогцолбор хөгжүүлэх хөтөлбөр юм. Хөтөлбөрийн хүрээнд нийт 5 ширхэг зуны хүлэмжийг байгуулсан бол хөтөлбөрийн үргэлжлэл болгон орон нутгийн санхүүжилтээр тус бүр нь  600 мкв 2 ширхэг өвлийн хүлэмжийг байгуулах юм. Ингээд Өмнөговь аймагт газар тариалан цэцэглэн хөгжихийн өлзийтэй ерөөлийг дэвшүүлье” гэсэн бол Оюу толгой компанийн Даланзадгад дахт төлөөлөгчийн газрын менежер Д.Олжмэдэх “Оюу толгой компани нь нийгмийн хариуцлагын хүрээнд Говийн оюу хөгжлийг дэмжих сангаар дамжуулан олон төсөл хөтөлбөрийг санхүүжүүлж байгаагийн нэг нь “Өмнөговь аймагт хүлэмжийн аж ахуйн цогцолборийг хөгжүүлэх” хөтөлбөр юм.  Говийн Оюу хөгжлийг дэмжих сангаас энэхү хөтөлбөрийн санал санаачлагыг 199,5 сая төгрөгөөр санхүүжүүлж, Хөдөө аж ахуйн их сургуулийн хэрэгжүүлж буй хөтөлбөрийн хүрээнд сургалтанд хамрагдаж мэдлэг чадвараа дээшлүүлж буй ногоочиддоо амжилт хүсье” гэв. Хөдөө аж ахуйн сургуулийн захирал Т.Хэрүүга “Их сургуулийн эрдэм шинжилгээний танхимд болдог эрдэм шинжилгээний хурлыг орон нутагт анх удаа амжилттай зохион байгууллаа. Мөн Хөдөө аж ахуйн их сургуулийн дэргэдэх Инноваци бизнес хөгжлийг төвд бий болсон 600 гаруй нэр төрлийн бүтээгдэхүүний дээжээс танилцуулж байгаадаа баяртай байна. Бид тухайн орон нутгийн онцлогт тохирсон инновацийн бүтээгдэхүүнийг танилцуулж, хөгжүүлэх ажлыг зохион байгуулж байна. Өнөөдөр энэхүү хүлэмжид тарьсан шинэ нэр төрлийн ногоонууд Өмнөговь аймгийн бүх нутагт ургаж үр шимээ өгнө гэдэгт найдаж байна.

Хөдөө аж ахуйн их сургууль, Солонгосын Кёнсанбүг аймгийн Хүнс хөдөө аж ахуйн хүрээлэнгийн эрдэмтэн мэргэдээр удирдуулсан Өмнөговийн тариаланчид хүлэмжийн аж ахуйн дараалсан сургалтанд хамргадан, амжилттай суралцсан тариаланч 5 иргэн Солонгос улсад хүлэмжийн аж ахуйн сургалтанд хамрагдахаар эрхийн бичгээ гардан авлаа.

Өмнөговь аймагт хүлэмжийн тариаланг говийн бүсийн гүний усны нөөцөд тулгуурласан сүүийн үеийн шийдэлтэй усалгааны систмеийн загварыг хөгжүүлж буй энэхүү хөтөлбөр үр өгөөжөө өгч орон нутгийн хөрсөнд тарьж ургуулсан эрүүл хүнсээр иргэдийн хүнсний хэрэгцээг хангах үйл хэргийн эхлэл болно гэдэгт итгэлтэй байна.