08 сар
Ханбогд сумын Сургууль цэцэрлэгийн цогцолборын барилгын шав тавих ёслол боллоо.
Өмнөговь аймгийн Ханбогд суманд Оюутолгой компанийн хөрөнгө оруулалттай "Говийн Оюу хөгжлийг дэмжих сан"-гийн санхүүжилтээр “640 хүүхдийн сургууль, 200 хүүхдийн цэцэрлэгийн цогцолбор” барилгын шав тавих ёслолын арга хэмжээ 08 сарын 5-нд боллоо. Энэхүү бүтээн байгуулалт нь 6,08 тэрбум төгрөгийн хөрөнгө оруулалтаар хийгдэх бөгөөд сургууль, цэцэрлэгийн цогцолбор, гадаа тоглоомын талбай, чийрэгжүүлэх танхим, өдөр өнжүүлэх, хөл бөмбөгийн талбай, цэвэр бохир дулааны шугам сүлжээнд холбогдсон цогцолбор барилга юм. Сургууль цэцэрлэгийн цогцолборын барилга 2018 оны наймдугаар сард ашиглалтад орохоор төлөвлөж байна.
Ханбогд суманд одоогоор хоёр цэцэрлэг, нэг сургууль үйл ажиллагаагаа явуулдаг бөгөөд 300 хүүхдийн хүчин чадалтай сургуульд 1200 гаруй хүүхэд хоёр ээлжээр хичээллэдэг юм байна. Багш нарын хүрэлцээ муу, анги дүүргэлт хэтэрсэн, сурах орчин дутмаг байгаа энэ цаг үед тус бүтээн байгуулалтыг барих гэж байгаад нутгийн зон олон, багш сурган хүмүүжүүлэгчид, хүүхэд багачууд, эцэг эхчүүд сэтгэгдэл өндөр байгаагаа илэрхийлж байлаа. Ханбогд суманд сургууль, цэцэрлэгийн цогцолбор ашиглалтад орсноор 1200 гаруй хүүхэд нэг ээлжээр хичээллэх бүрэн боломжтой болох юм.
Шав тавих ёслолд аймаг, сум дүүрэг, компаниудын төлөөллүүд, нутгийн иргэд, багш сурагчид ирж оролцсон.
Цогцолборын хөрөнгө оруулагч болох Оюутолгой компанийн үйл ажиллагаа эрхэлсэн захирал, ноён Стивен Жонс хэлэхдээ “Энэ сайхан ёслолд оролцож байгаадаа баяртай байна. Өмнийн говийн ирээдүй болсон багачуудынхаа сурах, мэдэх их үйлсэд хөрөнгө оруулалт хийж байгаа Оюутолгой компанийн хамт олон бидний зүгээс туйлын их баяртай байна. Нэг жилийн дараа барилга амжилттай нээлтээ хийнэ гэдэгт нь итгэж байна. Энэ төсөл Оюутолгой компанийн хувьд том төсөл. Өнөөдрийн байдлаар Оюутолгой төслийн хүрээнд 1200 гаруй хүн Ханбогд сумаас, ажилладаг. Тэр хүмүүсийн ард байгаа гэр бүл болгонд хүүхдүүд байгаа учир тэдгээр хүүхдүүдийг сайн суралцах боломжоор хангах компанийн хувьд маш том нийгмийн хариуцлагын асуудал юм. Мөн бидэнд 2017 онд Ханбогд суманд авч хэрэгжүүлэх олон төслүүд бий. Жишээ нь, сум дундын малын эрүүл мэндийн төв, Ханбогд сумын хог хаягдлын менежмент, сумын дулаан хангамж, уурын зуухын тогоо шинэчлэх, зөөлөн сандал , мэргэжлийн гэрэлтүүлэг гээд олон ажлууд хүлээж байгаа” гэлээ.
Сургууль цэцэрлэгийн цогцолбор барих хүрээнд орон нутгийн барилгын материал үйлдвэрлэгч болон барилгын компаниудыг дэмжиж ажиллах аж. Шаардлагатай техник тоног төхөөрөмжөөр хангах, туслан гүйцэтгэгч, түр ажлын байрууд бий болгох мөн барилга ашиглалтад орсноор шинээр 100 орчим ажлын байр шинээр бий болох юм. Ингэснээр хүмүүсийн амьжиргаа сайжрах, эдийн засагт сайнаар нөлөөлөхүйц бүтээн байгуулалт болох нь.