“Оюу Толгой” компанийн хөрөнгө оруулалттай “Говийн Оюу хөгжлийг дэмжих сан”-гийн санхүүжилтээр Өмнөговь аймгийн бүсийн оношилгоо эмчилгээний төвд байгуулж тохижуулсан сэргээн засах үйлчилгээний кабинетийн нээлтийн арга хэмжээ 2017-07-25 ны өдөр боллоо.

Хөгжлийн бэрхшээлтэй болон сэргээн засах эмчилгээ шаардлагатай иргэдэд зориулан Өмнөговь аймгийн ЗДТГ-ын захиалгаар Говийн оюу хөгжлийг дэмжих сангаас санхүүжүүлсэн уг хөтөлбөрийн гүйцэтгэгчээр энэ чиглэлийн үйлчилгээ, тоног төхөөрөмжийн ханган нийлүүлтийн чиглэлээр үйл ажиллагаа явуулдаг “Рехтус” компани гүйцэтгэж сэргээн засах үйлчилгээг иргэдэд цогцоор үзүүлэх кабинеттай боллоо.

Нээлтийн ёслолд Өмнөговь аймгийн Засаг Даргын Тамгын Газрын Ниймгийн хөгжлийн бодлогын хэлтсийн эрүүл мэндийн асуудал эрхэлсэн мэргэжилтэн М.Цэндсүрэн, Оюу толгой Компанийн Даланзадгад дахь төлөөлөгчийн газрын менежер Д.Олжмэдэх, Өмнөговь аймгийн Эрүүл мэндийн газрын дарга Ц.Өнөржаргал, Бүсийн Оношилгоо эмчилгээний төвийн дарга М.Энхээ болон эмнэлгийн эмч, сувилагч, ажилтан, иргэд, иргэний нийгмийн байгууллагын  төлөөлөл оролцсон.

Оюу Толгой компанийн Даланзадгад дахь төлөөлөгчийн газрын менежер Д.Олжмэдэх хэлсэн үгэндээ “Төслийг хэрэгжүүлэх санхүүжилтийн дүнг хэмжиж болох ч энэхүү Сэргээн засах үйлчилгээний кабинетаар үйлчлүүлэх иргэдэд өгөх үр өгөөжийг бид мөнгөн дүнгээр хэмжиж болохооргүй их ач холбогдолтой юм” гэсэн бол ЭМГ-ын дарга Ц.Өнөржаргал “Өнөөдөр бид сэргээн засах үйлчилгээний кабинеттай болж байгаадаа баяртай байна. Цаашид энэхүү кабинетийн үйл ажиллагаа өргөжиж сэргээн засах үйлчилгээний клиник болохын ерөөлийг дэвшүүлье” гэв.

“Хүн ямарваа нэгэн гэмтэл, бэртлээс улбаалан хөдөлмөрийн чадвараа түр хугацаагаар алдах, цаашлаад хөгжлийн бэрхшээлтэй болох нь тухайн хүний эрүүл мэнд, сэтгэлзүйд сөргөөр нөлөөлөөд зогсохгүй өрх гэрийн орлогын эх үүсвэр буурах, цаашлаад улсын эдийн засгийн бүтэц дэх халамжийн хувь хэмжээ нэмэгдэх, хөдөлмөр эрхлэх чадвартай хүн амын бууралт зэргээр улс орны хөгжилд нөлөөлөх нөлөөлөл нь асар их юм. Тиймээс нөхөн сэргээх эмчилгээг цаг алдалгүй хийлгэх, эмчилгээ үйлчилгээнд хамрагдах бааз суурийг бий болгох нь чухал юм” хэмээн Рехтус ХХК-ийн захирал В.Ойдов хэлсэн үгэндээ онцоллоо.

Сэргээн засах үйлчилгээний чиглэлээр Монголдоо анх удаа Орон нутгийн Бүсийн оношилгоо эмчилгээний төвийн их эмч, сувилагчийг Улсын чанартай эмнэлэгүүдэд цогц сургалтанд хамруулж, үйлчилгээнд шаардлагатай орчин үеийн стандартад нийцсэн сүүлийн үеийн тоног төхөөрөмжийг суурилуулсан бөгөөд 2018 оны 5 сард хөтөлбөр хэрэгжиж дуусах юм.